-चर्चित ढुंगेल

                                                      
चतुरेलाई हरेक विहान कसै न कसैले उठाउनु पर्छ । उसलाई उठाउनु हेमानेको मुढो उठाउनु जस्तै गाह्रो हुन्छ । कुम्भकर्णको पछिल्लो सन्तान भन्दा फरक पर्दैन उसलाई र ऊ पनि सहमतिले नै होला कसैले यसो भनिदिँदा सर्पले फँणा फिँजाएजस्तै गरेर गिजा देखाएर हाँस्छ । मानौँ कुम्भकर्ण साँच्चै नै उसैको जिजुबाजे हो र ऊ उसैको साखासन्तान ।
                   चतुरे यसरी भुस भएर सुत्नुको पछाडिको कारण पनि काइदाको छ । परदेश आएको पचास दिन नभइ उसले पाएसम्मका तरुनीका फोन नम्बर यहाँका रौथाने ठिटाहरुबाट उठायो । खानलाई पाएको करिब चार हजार नेपाली रुपैयाँ उसले पालैपालो नेपालदेखि यहाँसम्मका तरुनीलाई÷अर्काका स्वास्नीलाई फोनेर सकेछ र कालो अनुहार पारेर झन्डै झन्डै आँशु नै झारेर ऋण माग्न थालेछ । दाताहरुको कमी नभएको यो नेपाली समाजमा उसले मागे अनुसारको रकम पाएको छ र त्यो रकम फोनेर सदाएको छ ।
                                     दिनभरि ताता घाममा लखतरान भएर परान जाने गरी खटेर फर्किएपछि नहुहाइ शुरु हुन्छ उसको फोन संवाद । साथैमा छँदैछ चुरोटको सर्को र लुमाको सुर्को चिरिप्प । पकाएर खानुपर्ने उसको भान्छाघरमा खान बाहेक ऊ पकाउन औँशी-पुर्णेँमा पस्छ । प्रायः अरुले नै उसलाई ज्वाईँ मेजमान गराउँछन् । घरमा आमाबुवा श्रीमति र तीनजना सन्तान छन् भन्छ । तिसँग बोलेको थाहा पाउने देख्ने पुरै कम्पनिमा कोही छैन । तर हरेक दिन फोनमा झुण्डिएको नदेख्ने कोही छैनन् । मागेर चलाएको कम्प्युटरमा लण्डनदेखि लाओससम्मका तरुनीसँग च्याट गर्छ । कसैलाई दिदी÷बहिनी आमा÷सानिमा भनेको मैले मात्र होइन कसैले देखेकै÷सुनेकै छैन ।
                     अहिलेको इन्टरनेटको जमानामा फेसबूक चलाएर बेवकूफ हुनेहरुमा ऊ पनि अघिल्लो पंतिमा पर्छ । तरुनी बाहेकका साथी नबनाउने तर हरेक तरुनीका लागि अलग अलग खाता खोल्ने निति छ उसको । रेगिस्तानमा बसेर च्याट गरिरहँदा ऊ उसको ठेगाना रसिया बताउँछ । कतारको कुनै पार्कमा राम्ररी नघुमेको उसले धेरैलाई सार्क राष्ट्रमा परिभ्रमण गरेको सुनाइरहेको हुन्छ । थर मिल्ने मन्त्री वा नेता वा सभाषद्को छोरो भनेर उसले आफुलाई चिनाइरहँदा छेवैको म हिनहिनाइरहेको हुन्छु । कुनै तरुनीले कामका बारेमा सोधिन् भने "अक्सफोर्ड युनिभरसिटीमा पढ्छु भन्दिन्छ । पचास दिनमै पाँच सय बढि तरुनीलाई साथी बनाउन सक्नु कमसेकम मजस्ता तन्नेरीका लागि जीवनभरीको प्रयासले पनि असम्भव होला । यसमानेमा उसलाई धेरैले गुरु थपना गरेका छन् कसैकसैले त "मलाई पनि मिलाइ दे न !" भनेर उसको नामै जपन थालेका छन् ।
अव पत्रिका मात्रै रहेन उसले पनि त्यही उपाधि पाएको छ- "प्ले ब्वाई" । यसको नेपाली अर्थ हुन्छ- "खेल्ने केटो" । यही शब्दलाई सार्थक पार्न ऊ मोवाइल र कम्प्युटरमा आधारातसम्म खेलिरहन्छ- हरेक दिन नयाँ नयाँ तरुनीसँग । राती अबेरसम्म अनिदो बसेकाले ऊ विहान कुम्भकर्ण सुत्छ । यसो गरेर कतिपटक ड्युटी हापेर सुतेको छ ऊ । कतिपटक उसलाई लाने गाडीले छोडेर हिँडेका छन् । कतिपटक त तरुनीसँग च्याट्टिन उसले जानीजानी छुट्टि मारेको छ । ड्युटी नगएको दिनको तलब कटाएर अरु ऊसँगै काम गर्नेको भन्दा आधाउधी तलब थाप्छ उसले र त्यो फोनेर सिध्याउँछ । नेटमा देखेको र बोलेकै भरमा उसले धेरैलाई किम्ति उपहार पठाएको छ । घडी मोवाइल कि्रम र पाउडरादि ।
                                  चनमति इन्टरनेटकी किरो हो । दिनमा दर्जन बढि तन्नेरीसँग च्याट नगरी÷मोवाइलमा कुरा नगरी उसको मन भरिँदैन । ऊ रेगिस्तानमै कार्यरत छे । तर ज्यान जाला ऊ आफुले आजसम्म मिसकल बाहेक एककल कुनै तन्नेरीलाई गरेकी छैन । उसले इन्टरनेटमा बनाएका केटा साथी जत्ति छन् ति सवैको मोवाइल नम्बर राखेकी छे उसले । त्यसैले पैसाको खनखाँचोपर्दा मिसकल गर्न उसलाई सजिलो भएको छ । नेपालमा भएको श्रीमान्लाई पनि ऊ महिना महिनामा मिसकल गर्छे । उसको श्रीमान्ले उतैबाट फोन फर्काउँछ तर उसले यताबाट पैसा नफर्काएको बर्षौँ भयो । पछिल्लो सातादेखि चनमतिले चतुरेजस्तो ुदिलफेँक आसिकु पाएकी छे । चनमतिको मिसकल आउने बित्तिकै चतुरे अचेल चम्किलो चेहरा पार्छ र फोन मार्छ । धेरैचोटी चतुरेले चनमतीको मोवाइमा रिचार्ज कार्ड हालिदिएको छ । धेरैचोटी चतुरेले चनमतीका मोवाइलमा ब्यालेन्स ट्रान्सफर गरेको छ । भर्खरै मात्रै पनि चतुरेले चनमतीका लागि जोडदार सपिङ्ग गरीभ्यायो । सपिङ्ग महलमै हुँदा चतुरेकी घरकीले छोराछोरी नाङ्गै भएको खबर सुनाइथी तर उसले श्रीमतिको कुरो एक कानले सुनेर अर्को कानले उडाएको थियो ।
                         चतुरेले चनमतीजस्ता धेरै तरुनीसँग च्याट्यो तर उसलाई चनमतीजस्ती चाखलाग्दी कोही लागेनन् । त्यही भएर उसले चनमतीका लागि दिलोज्यानले खर्च गरेको छ । यो खर्च गराइमा उसले उसका घरका बाआमा श्रीमति र छोरछोरीलाई कहिल्यै सम्झेन । उसलाई "यसो नगरु भनेर सम्झाउनेलाई पनि कट्टर दुश्मन सम्झ्यो । अचेल कम्पनिमा ऊ कसैसँग बोल्दैन । ऋण दिनेहरुले बेल्चाको बिँढ देखाइसके । उसकी श्रीमतिले यो थाहा पाएर अर्को समाती । सुनिन्छ छोरछोरीको बिचल्ली छ रे ।
                           चनमतीले चतुरेजस्ता दर्जन बढि तन्नेरीको साथ पाएकी छे । उसको मोवाइल र थैली कहिल्यै खाली रहँदैन । उपहारादिले कोठा भरिभराउ छ । ऊ कुनै तन्नेरीलाई पनि "खर्च नगर परदेशमा कमाउन आएका तपाईँ दाजुभाइले कमाएको यतै सकेपछि घरमा के पठाउने " भनेर कहिल्यै सम्झाउँदिन । बरु चतुरेजस्ता धेरै धतुरेले ढाँटेजस्तै उसले पनि आफु अविवाहित भनी ढाँटिदिन्छे र कुरैले सवै थोक आँटी दिन्छे । यो कुरो थाहा पाएर चनमतीको घरबुढाले दुई छोरी पुलबाट खोलामा फलेर हिँड्यो जेलतिर । सुन्छु चनमतीका बुढा सासुससुराको हरिविजोक छ रे ।
                     विचरा चतुरे धतुरे र फतुरेहरु चनमती मनमती र धनमतीहरुका चिल्ला कुरामा फसेर घुँडा धसेर कमाएको स्वाहा पारिरहेछन् । दयालाग्दा चनमती मनमती र धनमतीहरु पनि चतुरे धतुरे र फतुरेहरुलाई डसिरहेछन् तिनका बाचा र कसममा फसाइरहेछन्÷फसिरहेछन् । छँदाखाँदाको घर बिगारेर श्रृंगारिएर परपुरुष÷परस्त्रीसँग नारिएर हिँड्नुभन्दा आफ्नै पौरखले कसैलाई नठगी गौरवले खानुमा जुन सुख छ त्यो कुनै र कोही मान्छेबाट पाइन्छ भने आफ्नै घरकी÷घरकोबाट पाइन्छ ।
                      उप्रान्त चतुरे र चनमतीहरुले गती नफालुन् । घर जलाएर आगो नतापुन् । मझेरी खनेर आँगन नपुरुन् । कसैलाई नठगुन् । कसैलाई नढाँटुन् । मेरा यि हात्ती कानले कसैको घर बिग्रेको सुन्नु नपरोस् । कसैको घर बिगारेर कसैलाई केही फाइदा छैन । एक पति÷पत्नी एक प्रेमी÷प्रमिका मानवका लागि काफी छ । बहुललाई घुमाउँदा आफैँ घुमिन्छ । कुरो बुझे मारिदिनु !