BABUGORKHALI

समाचार मनोरन्जन आदिको सगालो

बैंकर केकी

Published on Thursday, May 26, 2011 3:38 AM //



स्मृति ढुंगाना, काठमाडौं, जेठ १२- म्युजिक भिडियोको सुटिङमा धेरै भेटिने अभिनेत्री केकी अधिकारी मंगलबार अत्तरखेलस्थित नबिल बैंकको ‘कस्टमर सर्भिस'मा भेटिइन्। कुनै कथाले मागेको दृश्य थिएन त्यो। उनी ग्राहकहरूको चेक तयार गर्दै थिइन्। अर्की सहकर्मीले उनलाई एउटा फाइल देखाउँदै केही इशारा गरिरहेकी थिइन्।
हल्लैहल्लामा नेपाल बन्द भए पनि बैंकमा ग्राहकको भीड बाक्लै थियो। एउटी अधबैंसे महिला एक्कासी केकी बसिरहेको डेक्सअघि उभिएर टोलाइरहेकी थिइन्। केकीले झट्ट सोधिन्, ‘तपाईंलाई केही सहयोग गरौं?'
बैंकको शाखामा फिल्मी काममा होइन कलेजबाट प्रशिक्षार्थीको रूपमा उनी यी सब काम गर्दै थिइन्। ‘बन्द भए पनि व्यस्त छु,' उनीसँग बोल्ने फुर्सद थिएन। सुटिङमा जस्तो भद्दा मेकअप उनको अनुहारमा पोतिएको थिएन। बैंकमा काम विशेषले पुग्ने मानिसलाई केकीको अनुहारले झुक्याउँथ्यो।
बन्दले गर्दा मार्केटिङमा जान नपाएकोले ‘कस्टमर सर्भिस'को जिम्मेवारी मिलेको उनले बताइन्। घरबाट करिब १० मिनेटमा पुग्ने भएकोले बन्दले समस्या नपारेको उनले बताइन्।
प्राइम कलेजमा बिआइएम आठौं सेमेस्टरमा अध्ययनरत् केकीले ‘इन्टर्न'मा जान थालेको आठ दिन भएको जानकारी दिइन्। ‘असारभर म यहीँ व्यस्त हुन्छु,' उनले भनिन्।
केकीलाई भलादमी र कामप्रति जिम्मेवार भेेटेको बताए शाखा प्रमुख दिकेन्द्र चन्दले। ‘मलाई उनी को हुन् र के गर्छिन् भन्ने थाहा थिएन। छनोट भएपछि भने बल्ल उनी मोडल र अभिनेत्री हुन भन्ने थाहा पाएँ,' चन्दले भने।

मूल पेशाभन्दा फरक भए पनि काममा रमाइलो लागिरहेको बताइन् केकीले। दुई महिनाको ‘इन्टर्न'मा मार्केटिङ, क्यास रिसिभिङ, आइटीलगायत क्षेत्रमा काम गर्नुपर्ने उनले बताइन्। ‘एक हप्तामै झन्डै साढे दुई दर्जन ग्राहक बनाइसकेकी छु,' साथीसँग मार्केटिङको सिलसिलामा आरूबारी, बेसीगाउँ, जग्डोल र सुन्दरीजल घुमेको उनले बताइन्। ‘ग्राहकलाई विश्वास दिलाउन धेरै मेहनत गर्नुपर्ने रहेछ,' उनले अनुभव सुनाइन्।
उनीहरूलाई निर्देशन दिने विदुर लिम्बु भने केकी अधिकारीमा फ्यान रहेछन्। ‘केकी हाम्रो मार्केटिङको निम्ति प्लस प्वाइन्ट भएकी छिन्। उनीको बोल्ने शैली राम्रो भएकाले हामीलाई ग्राहकको संख्या बढाउन सहयोग पुगेको छ,' लिम्बुले भने। केकीको लगनशीलताको प्रशंसा समेत गरे उनले।
‘आइटी'को विद्यार्थी भएकाले बैंकमा प्रयोग हुने विभिन्न सफ्टवेयरबारे जान्न पाउँदा उत्साहित छिन् केकी। अचेल उनी बिहान साढे १० देखि साँझ ५ बजेसम्म बैंककै काममा व्यस्त हुन्छिन् उनी। ‘वैंकमै जागिर खाने विचार त छैन?' नागरिकको प्रश्नमा उनले भनिन्, ‘पढाइ नसकी कामबारे सोच्दिनँ।'

shbaar : nagarik online.

0 comments

Leave a comment