कविता
Published on Monday, December 5, 2011
8:19 AM //
कविता
|
आदिकवि भानुभक्तको १९८ औं जयन्तीको अवसरमा अन्तर्राष्टिय नेपाली साहित्य समाज कतार च्याप्टर र नवोदित साहित्यिक मोवाईल पुस्तकालय कतारद्धारा जुलाई ८ मा आयोजित कविता प्रतियोगितामा दितिय स्थान प्राप्त गर्न सफल कविता ।
-राजेश्वर ढकाल |
"सिङ्गो देश बोकेर फर्कन्छु ।"
सिङ्गो देश काधमा बोकेर
धाउछु म बिहान बेलुका
खोरिया पाखा र चौतारा
लिगलिगकोटको टुप्पोबाट
चल्छ बतासका वेग
ठोक्किएर धनेको बिर्खे टोपीमा
उड्दै उड्दै आईपुग्छ
मेरो घरको उदाङ्गो छानोसम्म
र गिज्याउँछ मेरो गरिबीलाई
सुनगाभा जस्तो बैंश
लाली गुराँस जस्तो नानीहरु
आगनमा फुलिरहदा
म चैते दशैको एक साँझ
सिद्धार्थ बनेर हराउँछु
गाँस बास र कपासको
मोक्ष प्राप्ती गर्न कुनै बिरानो देश
अपरिचत नागरिकहरुको नगर
जहाँ फुलिरहेका छन्
तातो घाममा कुमारी बैश
समुन्द्रका किनाराभरि
मानिसहरुको कृतिम सपना ।
हरेक दिन एउटा नौलो जीवन
हरेक प्रहर नयाँ परिघटनासँग
सुस्केरा हाल्दै निस्कछु म
उँटको बजार खजुरको बस्तीमा
जहाँ उँटहरु÷खजुरहरु
लस्करै उभिएकाछन्
पृथ्वी नारायण शाहको
सिपाहीहरु जस्तै ।
तर किन मलाई
मेरो देशको आयतन
र यो रेगिस्तानको बगर
उस्तै लाग्छ
दुरुस्तै लाग्छ
यहाँ हामी सिङ्गो देश
छातिभित्र बोकेर बाँचेका छौ
देशभित्रका मानिसहरु
देशलाई छिमेकीको कन्टेनरमा
फालेर बाँचेका छन् ।
अब म मेरो देश फर्कन्छु
सगरमाथाको शिखरबाट
एक अंजुली सद्भाव ल्याउँछु
केचनाको फाँटबाट
एक मुठ्ठी शान्ति ल्याउँछु
र
गोरखाको किल्लाबाट
शान्ति सम्बृद्धी र एकताको
बिगुल फुक्छु ।
बगुवा-६गोरखा
हाल-कतार
|
0 comments